نیویارک (پاکستان نیوز)نیویارک شہر میں اشیائے خوردونوش کی مسلسل بڑھتی ہوئی قیمتوں پر قابو پانے کیلئے میئر زوہران ممدانی نے شہر کی ملکیت میں چلنے والے خصوصی گروسری اسٹورز قائم کرنے کا اہم منصوبہ پیش کیا ہے۔ اس منصوبے کے تحت شہریوں کو روزمرہ استعمال کی بنیادی اشیاء خاص طور پر تازہ سبزیوں، پھلوں اور گوشت کی خریداری پر تیس فیصد تک کی رعایت فراہم کی جائے گی۔اس انتظامی منصوبے کے مطابق میئر کی چار سالہ مدت کے دوران نیویارک کے تمام پانچوں اضلاع میں ایک ایک بلدیاتی اسٹور کھولا جائے گا۔ منصوبے کا پہلا اسٹور 2027کے آخر تک دی برونکس میں فعال کیا جائے گا۔ ان اسٹورز کی خریدو فروخت اور روزمرہ کے انتظامات کے لیے نجی شعبے کی خدمات حاصل کی جائیں گی جبکہ دکانوں کے کرائے اور جائیداد کے ٹیکسوں کا خرچ بلدیاتی حکومت خود برداشت کرے گی۔ مقامی چھوٹے تاجروں اور کونے پر قائم بویڈگا دکانوں کے خدشات کو دور کرنے کے لیے ان اسٹورز میں گرم کھانا، سگریٹ اور مشروبات بیچنے پر مکمل پابندی ہوگی تاکہ چھوٹے کاروباریوں کی آمدنی متاثر نہ ہو۔ تاہم کچھ مالیاتی اداروں اور بجٹ مبصرین نے اس حکومتی امداد پر مبنی منصوبے پر سوالات اٹھاتے ہوئے اس کا تفصیلی مالیاتی تجزیہ کرنے کا مطالبہ بھی کیا ہے۔
