آج کل ہر چیز کی وضاحت ماضی کی طرف دیکھ کر کی جاتی ہے۔ انسان کا غصہ بچپن کے صدمے کی وجہ سے ہوتا ہے، نظم و ضبط کی کمی والدین کی وجہ سے بتائی جاتی ہے اور انسان کے گناہ اس کے ماحول کی وجہ سے قرار دئیے جاتے ہیں۔ بے شک، پرورش انسان پر گہرے اثرات چھوڑتی ہے اور ہر شخص کی آزمائش مختلف ہوتی ہے۔ کچھ لوگ محبت بھرے گھروں میں پرورش پاتے ہیں، جبکہ کچھ غفلت، زیادتی اور مشکلات کے ماحول میں بڑے ہوتے ہیں۔ اسلام ان حقیقتوں کا انکار نہیں کرتا لیکن اسلام نے کبھی ماضی کو حال کے لیے مستقل بہانہ نہیں بنایا۔ انسان کی شناخت اس کے صدموں سے متعین نہیں ہوتی بلکہ وہ سب سے بڑھ کر اللہ کا بندہ ہے۔ وہ جس گھر میں پلا بڑھا، اس کے والدین جیسے بھی تھے اور اس نے جو حالات دیکھے، وہ اللہ کے سامنے اس کی ذمہ داری ختم نہیں کر دیتے۔ انسان اپنے ایمان، اپنے اعمال اور اپنی آزمائشوں کے مقابلے میں اپنے ردِعمل کے لیے جواب دہ ہے۔ صحابہ کرام رضی اللہ عنہم کی زندگیوں کو دیکھیں۔ ان میں کچھ مالدار اور معزز خاندانوں سے تھے، کچھ غلام تھے۔ کچھ نے برسوں بتوں کی عبادت کی، کچھ اپنی سختی اور خونریزی کے لیے مشہور تھے اور کچھ اسلام قبول کرنے سے پہلے گناہوں میں مبتلا تھے۔ کچھ ایسے معاشرے میں پلے بڑھے جہاں بیٹیوں کو زندہ دفن کیا جاتا تھا اور کچھ نے خود اسلام کیخلاف جنگ کی۔ لیکن اسلام نے انہیں بدل دیا۔ حضرت عمر بن خطاب رضی اللہ عنہ اسلام کے سخت مخالفین میں سے تھے، لیکن بعد میں امت کے عظیم ترین رہنماؤں میں شمار ہوئے۔ حضرت خالد بن ولید رضی اللہ عنہ نے غزو? اْحد میں مسلمانوں کے خلاف لشکر کی قیادت کی، پھر اسلام قبول کیا، دین کے دفاع میں نمایاں کردار ادا کیا اور سیف اللہ کہلائے۔ حضرت بلال بن رباح رضی اللہ عنہ غلامی اور شدید ظلم برداشت کرتے رہے، پھر رسول اللہ صلی اللہ علیہ وسلم کے مؤذن بننے کا شرف حاصل کیا۔ حضرت وحشی رضی اللہ عنہ نے غزوہ اْحد میں حضرت حمزہ بن عبدالمطلب رضی اللہ عنہ کو شہید کیا، بعد میں اسلام قبول کیا اور مسیلمہ کذاب کے خلاف جنگ میں اسی نیزے کو استعمال کیا، جیسا کہ صحیح البخاری کی حدیث 4072 میں مذکور ہے۔ اللہ ان سب سے راضی ہو۔ اسلام نے انہیں یہ نہیں کہا کہ وہ ساری زندگی اس بات سے متعین ہوتے رہیں کہ وہ پہلے کیا تھے، بلکہ اسلام نے انہیں سکھایا کہ اپنی پہچان اللہ کے ساتھ اپنے تعلق اور اپنے اعمال سے بنائیں۔
حسن بصری رحمہ اللہ سے منقول ہے کہ مومن اپنی ذات کا نگہبان ہے اور وہ اللہ کی خاطر اپنا محاسبہ کرتا ہے، جیسا کہ الزہد والرقائق لابن المبارک کی روایت 308 میں درج ہے۔ یہی خود احتسابی کا راستہ ہے۔ ایک مومن اپنی ذمہ داری قبول کرتا ہے اور اپنی پوری زندگی یہ ثابت کرنے میں نہیں گزار دیتا کہ وہ ایسا کیوں ہے، بلکہ یہ کوشش کرتا ہے کہ اللہ اسے کیسا بنانا چاہتا ہے۔ اس کا مطلب یہ ہرگز نہیں کہ حقیقی زخموں کو نظرانداز کر دیا جائے۔ ضرورت ہو تو مدد حاصل کرنا اور شفا کی کوشش کرنا قابلِ قدر ہے، لیکن اپنی مشکلات کو سمجھنا ایک چیز ہے اور انہیں ہمیشہ کے لیے اپنا بہانہ بنا لینا دوسری چیز ہے۔ کچھ لوگ اپنے بچپن کے صدموں کے بارے میں اللہ کی عائد کردہ ذمہ داریوں سے زیادہ جانتے ہیں۔ ایک وقت آتا ہے جب انسان کو یہ کہنا چھوڑ دینا چاہیے کہ وہ ایسا ہی ہے، اس کی پرورش ہی ایسی ہوئی ہے یا اس کا ماضی اسے ہمیشہ متعین کرے گا، اور یہ پوچھنا شروع کرنا چاہیے کہ آج اللہ اس سے کیا چاہتا ہے اور اللہ سے ملاقات سے پہلے وہ کیا بدل سکتا ہے۔ اللہ تعالیٰ کا فرمان ہے کہ بے شک اللہ کسی قوم کی حالت نہیں بدلتا جب تک وہ خود اپنی حالت نہ بدلیں، جیسا کہ سورة الرعد کی آیت 11 میں بیان ہوا ہے۔ ہو سکتا ہے کسی کا بچپن مشکل رہا ہو، زخم حقیقی ہوں اور کسی کو ان جنگوں کا اندازہ نہ ہو جن کا اس نے سامنا کیا۔ لیکن ماضی کو اپنے مستقبل کا فیصلہ کرنے کا اختیار نہیں دینا چاہیے۔ اللہ وہی ہے جس نے لوگوں کو شرک اور جاہلیت سے نکالا اور صحابہ کرام رضی اللہ عنہم کو اس امت کی بہترین نسل بنایا، اور وہی اللہ آج بھی سب کا رب ہے۔ جو چیز توڑ گئی، صرف اس کے اثرات سمجھنے میں ماہر بننے کے بجائے اس راستے کو پہچاننے میں ماہر بننا چاہیے جو نجات دے گا۔ توبہ کے دروازے کھلے ہیں اور رب آج بھی دن میں پانچ مرتبہ پکارتا ہے۔ کتابِ اعمال ابھی بھی لکھی جا رہی ہے اور جنت کے دروازے بند نہیں ہوئے۔ ماضی انسان کی جدوجہد کی وضاحت کر سکتا ہے، لیکن اسے منزل کا فیصلہ کرنے کا اختیار نہیں۔ اسلام نے صحابہ کو بدل دیا تھا، لہٰذا اب اسلام کو انسان کو خود بھی بدلنے دینا چاہیے۔
