لاہور:   عامر اوروقار یونس میں ٹویٹر پر جنگ چھڑ گئی،ٹیسٹ کرکٹ چھوڑنے پر بولنگ کوچ کا تبصرہ محمد عامر کو ایک آنکھ نہ بھایا، سابق کپتان نے کہا کہ پیسر کام کے بوجھ کی وجہ سے باہر ہوئے نہ کرکٹ چھوڑی، لیگز کھیل تو رہے ہیں، جواب میں عامر نے کہا کہ وجہ سرکار وقار یونس صاحب ہی بتا سکتے ہیں، اللہ ایسی سوچ رکھنے والوں کو ہدایت دے۔ سوشل میڈیا پر یہ بیان جاری کرتے ہی دلچسپ تبصرے شروع ہوگئے۔تفصیلات کے مطابق کوئنز ٹاؤن سے ویڈیو کال پر پاکستانی میڈیا سے گفتگوکرتے ہوئے قومی ٹیم کے بولنگ کوچ وقار یونس نے کہا کہ میں نہیں سمجھتا کہ محمد عامر کام کے بوجھ کی وجہ سے باہر ہوئے یا انھوں نے کرکٹ چھوڑدی ہے، پیسر وائٹ بال کرکٹ کھیل رہے ہیں، اس میں تو ان کا کوئی مسئلہ نہیں ہے، انھیں میں نے حال ہی میں ایک ٹی ٹوئنٹی لیگ کھیلتے ہوئے دیکھا ہے،اس میں کام کے بوجھ والی کوئی بات نہیں،ٹیسٹ کرکٹ کو چھوڑنا ان کا ذاتی مسئلہ تھا۔ سوشل میڈیا پر وقار یونس کی یہ بات منظر عام پر آئی، صحافی شعیب جٹ نے وقار یونس کا بیان ٹویٹ کیاکہ محمد عامر نے کام کے دباؤکی وجہ سے ریڈ بال کرکٹ نہیں چھوڑی،ساتھ ہی پیسر سے وجہ بھی پوچھ لی۔ اس کا ٹویٹر پر ہی جواب دیتے ہوئے عامر نے کہا کہ پھر یہ سرکار وقار یونس صاحب ہی بتا سکتے ہیں،اللہ ہدایت دے انھیں جو ایسی سوچ رکھتے ہیں، یاد رہے کہ دورۂ نیوزی لینڈ کیلیے اسکواڈ سے ڈراپ ہونے پر بھی جب محمد عامر سے پوچھا گیا تو انھوں نے چیف سلیکٹر کو نشانے پر رکھتے ہوئے کہاکہ مصباح الحق صاحب ہی بتا سکتے ہیں،بہرحال ٹیم گرین شرٹس کیلیے نیک خواہشات ہیں۔یاد رہے کہ محمد عامر کو زمبابوے کیخلاف ہوم سیریز سے ڈراپ کردیا گیا تھا،اس کے بعد دورۂ نیوزی لینڈ کیلیے بھی اسکواڈ میں انھیں شامل نہیں کیا گیا۔

کراچی:

بابر اعظم اور شاداب خان کی انجری کے سبب نیوزی لینڈ سے سیریز میں گرین شرٹس کو نئے کپتان کے تقرر کی ضرورت پڑ سکتی ہے، گوکہ ٹیم مینجمنٹ کو شاداب کے بروقت فٹ ہونے کی امید ہے، البتہ پلان بی میں محمد رضوان، عماد وسیم اور محمد حفیظ شامل ہیں۔

رضوان کے ساتھ عبداللہ شفیق اوپننگ کیلیے فیورٹ ہیں،ضرورت پڑنے پر شاہینز کے ذیشان ملک کو بھی موقع دیا جا سکتا ہے۔تفصیلات کے مطابق انجری کی وجہ سے بابر اعظم نیوزی لینڈ کیخلاف ٹی ٹوئنٹی سیریز سے باہر ہو چکے ہیں، ان کے نائب شاداب خان بھی مکمل فٹ نہیں،ہیڈ کوچ مصباح الحق عندیہ دے چکے کہ ان کی فٹنس پر کوئی خطرہ مول نہیں لیا جائے گا،اگر شاداب بروقت ٹھیک نہ ہو سکے تو پھر گرین شرٹس کو نئے کپتان کا انتخاب کرنا ہوگا، ذرائع کے مطابق محمد رضوان، عماد وسیم اور محمد حفیظ میں سے کسی کو ذمہ داری سونپنے پر غور جاری ہے۔

گوکہ مینجمنٹ کوامید ہے کہ شاداب دستیاب ہوں گے لیکن پلان  بی کے تحت متبادل کپتان کا بھی سوچا جانے لگا، رضوان فیورٹ نظر آتے ہیں، ان کی زیر قیادت رواں برس خیبرپختونخوا نے قومی ٹی ٹوئنٹی ٹائٹل بھی جیتا تھا، اسی طرح عماد نے کراچی کنگز کو پی ایس ایل 5 کا فاتح بنایا ہے۔

حفیظ کی مصباح سے خاصی دوستی ہے لیکن وہ بورڈ کے منظور نظر نہیں ہیں، دوسری جانب بابرکی عدم موجودگی میں اب پاکستانی ٹیم کو نئے اوپنر کی تلاش ہوگی، فخر زمان پہلے ہی سیریز سے باہر ہو گئے تھے۔

یوں اب کیویز کیخلاف نیا اوپننگ پیئر میدان میں اترے گا،ذرائع نے بتایا کہ بابر کی انجری سے قبل ہی محمد رضوان سے اننگز کا آغاز کرانے  کا پلان بنا لیا گیا تھا،ان کے ساتھی ممکنہ طور پر عبداللہ شفیق ہوں گے، شاہینز میں شامل ذیشان ملک نے سینئر ٹیم کے پریکٹس میچ میں برق رفتار نصف سنچری بنا کراپنی جانب توجہ مبذول کرا لی،گوکہ وہ ٹی20 اسکواڈ میں شامل تو نہیں ہیں لیکن ضرورت پڑنے پر انھیں موقع دیا جا سکتا ہے۔