اسلام آباد:
مسلم لیگ (ن) کے صد شہباز شریف، جے یو آئی (ف) کے سربراہ مولانا فضل الرحمان اور چیئرمین پیپلز پارٹی بلاول بھٹو زرداری نے بجٹ منظور نہ ہونے دینے پر اتفاق کرتے ہوئے کہا ہے کہ موجودہ بجٹ آئی ایم ایف کے نمائندوں نے بنایا ہے جو عوام اور ملک دشمن ہے۔
ایکسپریس نیوز کے مطابق اسلام آباد میں اپوزیشن رہنماوں کی بڑی بیٹھک ہوئی جس میں حکومت مخالف تحریک چلانے کے لیے صلاح و مشورے کیے گئے۔ اپوزیشن لیڈر شہباز شریف اور بلاول بھٹو زرداری نے وفود کے ہمراہ مولانا فضل الرحمان سے الگ الگ ملاقاتیں کیں جن میں حکومت مخالف تحریک اور اپوزیشن جماعتوں کی آل پارٹیز کانفرنس کے حوالے سے مشاورت کی گئی۔
چیئرمین پیپلز پارٹی بلاول بھٹو زرداری نے جمعیت علمائے اسلام (ف) کے سربراہ مولانا فضل الرحمان سے ان کی رہائش گاہ پر ملاقات کی، ملاقات میں ملک کی موجودہ سیاسی صورتحال، اپوزیشن رہنماؤں کی گرفتاریوں اور بجٹ کے حوالے سے بات کی گئی جب کہ حکومت مخالف تحریک کے حوالے سے بھی تبادلہ خیال کیا گیا۔
حکومت کا خاتمہ ہی موجودہ صورتحال سے نجات کا ذریعہ ہے،فضل الرحمان
ملاقات کے بعد جمعیت علمائے اسلام (ف) کے سربراہ مولانا فضل الرحمان کا کہنا تھا کہ موجودہ حکومت نے ملکی معیشت کا بیڑا غرق کیا، پاکستان کی تاریخ میں اتنے قرضے نہیں لیے جتنے اس حکومت نے لے لئے، ڈالرکی قیمت 157 چلی گئی ہے، غریب شہری آج بازار سے راشن خریدنے کے قابل نہیں رہا، حکومت کا خاتمہ ہی موجودہ صورتحال سے نجات کا ذریعہ ہے۔
مولانا فضل الرحمان نے کہا کہ موجودہ بجٹ ملک اور غریب دشمن ہے جسے براہ راست آئی ایم ایف نے یہاں آ کر بنایا ہے، اور ہمیں معاشی غلام بنا دیا گیا، اس بجٹ کے بعد عوام راشن بھی خریدنے کے قابل نہیں رہے گا، ایک جعلی اور دھاندلی شدہ الیکشن پر ہمارا پہلے دن جو موقف تھا آج بھی وہی ہے، یہ لوگ ملک پرحکومت کرنے کا کوئی جوازنہیں رکھتے، آج ملاقات میں اپوزیشن کی حکومت مخالف تحریک اور اے پی سی پر مشاورت ہوئی، جون کے آخری عشرے میں اے پی سی کریں گے اوراسی کے فیصلوں کی روشنی میں اپنا لائحہ عمل طے کریں گے اور ایک متفقہ بیانیہ لےکرپارٹیاں میدان میں آئیں گی۔
حکومت مدت پوری کرے یا نہ کرے پارلیمان کو مدت پوری کرنی چاہئے،بلاول
چیئرمین پیپلزپارٹی بلاول بھٹو زرداری کا کہنا تھا کہ آج کٹھ پتلیوں کی حکومت میں ہمارے سیاسی و معاشی نقصان ہورہے ہیں، ہم مل کر قوم کو اس نقصان سے بچائیں گے، موجودہ بجٹ ایک عالمی ادارے کے حکم پر بنا ہے، دھاندلی زدہ حکومت دھاندلی بجٹ پاس کرناچاہتی ہے لیکن ہماری کوشش ہے کہ عوام دشمن بجٹ پاس نہ ہو اور پورا یقین ہے عوام کو اس بجٹ سے بچا سکیں گے۔
بلاول بھٹو کا کہنا تھا کہ مولانا فضل الرحمان اور ہمارے موقف میں تھوڑا سا فرق ہے مولانا صاحب کہتے ہیں حکومت جائے، ہم کہتے ہیں پارلیمان اپنی مدت پوری کرے۔ ان کا کہنا تھا کہ حکومت مدت پوری کرے یا نہ کرے پارلیمان کو مدت پوری کرنی چاہئے، پیپلز پارٹی ہمیشہ سے کہتی آئی ہے نظام چلتا رہے۔
زندگی میں اتنا جھوٹا وزیراعظم نہیں دیکھا، شہباز شریف
اسی طرح مسلم لیگ (ن) کے صدر میاں شہباز شریف نے بھی مولانا فضل الرحمان سے ملاقات کی اور حکومت مخالف تحریک سے متعلق آئندہ کے لائحہ عمل پر بات چیت کی۔ ملاقات کے بعد میڈیا سے گفتگو کرتے ہوئے شہباز شریف نے کہا کہ زندگی میں اتنا جھوٹا وزیراعظم نہیں دیکھا جس کے 10 ماہ کے ظالمانہ اقدامات نے عادم آدمی کی زندگی جہنم بنا دی، عام آدمی سے مل کر حکومت کو غریب دشمن بجٹ واپس لینے پر مجبور کریں گے۔
