واشنگٹن (پاکستان نیوز)مشرق وسطیٰ میں بڑھتی ہوئی فوجی کشیدگی کے درمیان امریکی فضائیہ کا ایک اہم ایندھن فراہم کرنے والا طیارہ قطر کے قریب لاپتہ ہو گیا ہے۔ فلائٹ ٹریکنگ ڈیٹا کے مطابق بوئنگ کے سی 135 طیارے نے، جسے فضا میں اڑتا ہوا گیس اسٹیشن بھی کہا جاتا ہے، خلیج فارس کے اوپر پرواز کے دوران 7700 کا ہنگامی کوڈ جاری کیا جو طیارے میں کسی سنگین خرابی یا خطرے کی علامت سمجھا جاتا ہے۔ یہ طیارہ متحدہ عرب امارات کے الظفرہ فضائی اڈے سے روانہ ہوا تھا جس کے بعد اس کے سگنل اچانک منقطع ہو گئے۔ اعداد و شمار سے پتا چلتا ہے کہ رابطہ ٹوٹنے سے قبل طیارہ فضا میں کافی دیر تک دائروں میں چکر لگاتا رہا اور پھر اس نے تیزی سے نیچے کی طرف اترنا شروع کر دیا۔ اگرچہ ابھی تک اس واقعے کی کوئی باقاعدہ وجہ سامنے نہیں آئی، لیکن یہ واقعہ ایک ایسے وقت میں پیش آیا ہے جب خطے میں شدید بے چینی پائی جاتی ہے۔ ایرانی خبر رساں اداروں نے بھی اس طیارے کے غائب ہونے کی تصدیق کی ہے، تاہم ایران کی جانب سے اس معاملے میں کسی قسم کی مداخلت کا کوئی بیان سامنے نہیں آیا۔ یاد رہے کہ رواں برس مارچ میں بھی عراق میں ایک امریکی طیارہ ایران نواز گروہوں کی کارروائی میں تباہ ہو چکا ہے۔ یہ طیارہ امریکی فضائی کارروائیوں میں ریڑھ کی ہڈی کی حیثیت رکھتا ہے کیونکہ یہ بمبار اور لڑاکا طیاروں کو طویل فاصلے تک پرواز کرنے کے لیے فضا میں ہی ایندھن فراہم کرتا ہے۔ اس کے علاوہ یہ طیارہ زخمی فوجیوں کی منتقلی اور بھاری سامان کی نقل و حمل کے لیے بھی استعمال ہوتا ہے۔ امریکی حکام نے ابھی تک طیارے کی موجودہ حالت اور عملے کے بارے میں خاموشی اختیار کر رکھی ہے۔
