واشنگٹن (پاکستان نیوز)امریکی وفاقی تحقیقاتی ادارے ایف بی آئی اور محکمہ انصاف نے واشنگٹن میں وائٹ ہاؤس کے جنوبی چمن میں منعقدہ تاریخی یو ایف سی فریڈم 250 ریسلنگ مقابلے پر ایک انتہائی ہولناک اور منظم دہشت گردانہ حملے کی بڑی سازش کو ناکام بنانے کا انکشاف کیا ہے۔ حکام کے مطابق اس مربوط سازش کا مقصد تقریب میں موجود 4300 سے زائد شرکاء بشمول دنیا کے امیر ترین ارب پتی افراد اور اعلیٰ سیاسی قیادت کو نشانہ بنا کر بڑے پیمانے پر جانی نقصان پہنچانا تھا۔ تفتیشی دستاویزات سے معلوم ہوا ہے کہ حملہ آوروں نے دھماکہ خیز مواد سے لیس تجارتی ڈرون طیاروں کے ذریعے وائٹ ہاؤس کے قریبی حصوں پر بمباری کا منصوبہ بنا رکھا تھا تاکہ وہاں موجود لوگوں میں شدید افراتفری پھیلے اور وہ باہر کی طرف بھاگیں۔ اس خوف و ہراس کے دوران تماشائیوں کو پہلے سے گھات لگا کر بیٹھے نشانہ بازوں کی زد میں لانے کی منصوبہ بندی کی گئی تھی جبکہ دوسرے مرحلے میں وائٹ ہاؤس کے مرکزی دروازوں پر دھاوا بولنا تھا۔ اس بھیانک منصوبے کا سراغ اس وقت ملا جب ایک ملزم کے قریبی رشتہ دار نے پولیس کو مشکوک سرگرمیوں کی اطلاع دی جس کے بعد سکیورٹی اداروں نے فوری کارروائی کرتے ہوئے ریاست اوہائیو سے ایک مشتبہ شخص کو گرفتار کیا۔ ملزم کے فون کی جانچ پڑتال سے ایک خفیہ نیٹ ورک بے نقاب ہوا جس میں 23 افراد حملے کی حتمی تیاریوں میں مصروف تھے اور بارہ مختلف وفاقی فیلڈ دفاتر نے مشترکہ کارروائی کرتے ہوئے پانچ اہم ترین ملزمان کو حراست میں لے لیا۔ یہ اہم تقریب 14 جون کو منعقد ہوئی تھی جس میں صدر ڈونلڈ ٹرمپ، ایلون مسک اور مارک زکربرگ سمیت کثیر تعداد میں بااثر شخصیات نے شرکت کی تھی تاہم سخت ترین حفاظتی انتظامات کے باعث تقریب پرامن طور پر مکمل ہو گئی۔
