مشی گن (پاکستان نیوز)مشی گن میں امریکی سینیٹ کے پرائمری انتخاب سے قبل ڈیموکریٹک پارٹی کے اہم امیدواروں عبدالسید اور ہیلی سٹیونز کے درمیان آخری مناظرے میں زبردست سیاسی تصادم دیکھنے میں آیا ہے۔ ریاست میں 4 اگست کو ہونے والے پرائمری انتخاب سے چند روز قبل ہونے والے اس ٹیلی ویڑن مناظرے میں ترقی پسند رہنما عبدالسید اور اعتدال پسند نمائندے ہیلی سٹیونز نے انتخابی مہم کے فنڈز، خارجی پالیسی اور عوامی نمائندگی جیسے اہم امور پر ایک دوسرے کو نشانہ بنایا۔ اس مقابلے کی اہمیت اس لیے بھی بڑھ گئی ہے کیونکہ یہ ڈیموکریٹک پارٹی کی اندرونی نظریاتی سمت کا فیصلہ کرے گا اور فاتح امیدوار نومبر کے حتمی انتخاب میں ریپبلکن امیدوار مائیک راجرز کا مقابلہ کرے گا۔ مناظرے کے دوران عبدالسید نے ہیلی سٹیونز پر الزام عائد کیا کہ ان کی مہم کو بڑے کارپوریٹ اداروں اور خاص طور پر اسرائیل کی حمایت کرنے والی تنظیموں کی جانب سے کروڑوں ڈالر کی مالی امداد مل رہی ہے۔ انہوں نے موقف اختیار کیا کہ انتخابی عمل میں اس قدر بڑی رقم کی شمولیت عوامی مسائل سے توجہ ہٹا دیتی ہے اور نمائندوں کو عام شہریوں کے بجائے مفاد پرست گروہوں کا پابند بنا دیتی ہے۔ اس کے جواب میں ہیلی سٹیونز نے بیرونی فنڈنگ کے اثرات کو مسترد کرتے ہوئے کہا کہ ان کی پالیسیاں اور ووٹ کسی مالی امداد کے مرہون منت نہیں ہیں۔ انہوں نے اپنے حریف پر ذاتی نوعیت کی سیاست کرنے اور قومی سطح پر تشہیر حاصل کرنے کا الزام لگایا۔ دونوں رہنماؤں کے درمیان مشرق وسطی کی پالیسی اور بالخصوص اسرائیل کے لیے امریکی فوجی امداد پر بھی گہرے اختلافات نمایاں ہوئے۔ عبدالسید نے اسرائیل کو فوجی امداد کی فراہمی کو ٹیکس دہندگان کے پیسوں کا غلط استعمال قرار دیا، جبکہ ہیلی سٹیونز نے دو ریاستی حل کی حمایت کرتے ہوئے اپنے موقف کا دفاع کیا۔ دونوں امیدواروں نے ایک دوسرے کی شفافیت اور مالیاتی بیانات پر بھی سوالات اٹھائے۔ اس شدید مقابلے کو آئندہ سینیٹ کے توازن اور ڈیموکریٹک پارٹی کے مستقبل کے حوالے سے انتہائی اہم قرار دیا جا رہا ہے۔
