اسلام آباد (پاکستان نیوز)روس نے بحر ہند تک براہ راست تجارتی رسائی حاصل کرنے کے لیے ماسکو سے بھارتی شہر ممبئی تک ریلوے لائن قائم کرنے کی تجویز پیش کی ہے۔ روس کے نائب وزیر اعظم مرات کے مطابق یہ مجوزہ راستہ ترکمانستان، ایران، افغانستان اور پاکستان سے ہوتا ہوا بھارت تک پہنچ سکتا ہے۔ روس کی جانب سے اس زمینی راستے کی تلاش کی بنیادی وجہ بحیرہ اسود میں باسفورس اور خلیج فارس میں آبنائے ہرمز جیسے روایتی سمندری راستوں پر بڑھتی ہوئی کشیدگی اور معاشی خطرات ہیں۔ یوکرین جنگ اور مشرق وسطیٰ کی حالیہ صورتحال کی وجہ سے سمندری مال برداری کے انشورنس اخراجات میں نمایاں اضافہ ہوا ہے جس نے روس کو متبادل زمینی راستے تلاش کرنے پر مجبور کیا ہے۔ سال دو ہزار چوبیس میں روس ایران کے راستے بھارت کو کوئلہ منتقل کر کے اس روٹ کا ابتدائی تجربہ بھی کر چکا ہے۔ دوسری طرف بھارت اور روس کے درمیان باہمی تجارت نٹھتر ارب ڈالر کی تاریخی سطح پر پہنچ چکی ہے اور دونوں ممالک سال دو ہزار تیس تک اسے ایک سو ارب ڈالر تک پہنچانے کے لیے کوشاں ہیں۔ تاہم اس منصوبے کی راہ میں کئی جیو پولیٹیکل چیلنجز بھی حائل ہیں کیونکہ یہ روٹ پاکستان سے گزرتا ہے جس پر بھارت کو شدید سیاسی و دفاعی تحفظات ہو سکتے ہیں۔ اس کے علاوہ پاکستان کے ریلوے انفراسٹرکچر میں چین کی بھاری سرمایہ کاری کی وجہ سے بھارت اس نیٹ ورک کو لے کر تحفظات رکھتا ہے۔ انہی وجوہات کی بنا پر بھارت ایران کی چاہ بہار بندرگاہ اور مشرقی سمندری راہداری جیسے متبادل راستوں پر زیادہ توج? دے رہا ہے۔
