نیویارک (پاکستان نیوز)اسلام فوبیا اور شدت پسندی اور نفرت آمیز واقعات کے لیے بدنام ”پراﺅڈ بوائز“ تنظیم نے صدارتی انتخابات کے پہلے مباحثے کے دوران ٹرمپ کی جانب سے تنظیم کی تعریف کرنے کے اقدام کو سراہا ہے ، نیویارک ٹائمز کے نمائندہ مائیک بیکر نے بتایا کہ تنظیم کے کسی رکن نے سوشل میڈیا کی ایپ ٹیلی گرام پر ٹرمپ کے جواب میں لکھا ہے کہ “Standing by sir,” جس کا مطلب ہے کہ بدنام زمانہ تنظیم ٹرمپ کے اشارے پر کسی بھی تخریب کار کارروائیوں کے لیے تیار ہیں ۔ ٹرمپ کے پیغام اور بدنام زمانہ تنظیم کے جواب کے بعد امریکہ میں انتخابات کے بعد خانہ جنگی کے خطرے کو تقویت مل رہی ہے کیونکہ اگر ٹرمپ نے انتخابات کے نتائج کو تسلیم نہ کیا تو ملک میں خانہ جنگی کا آغاز ہو سکتا ہے ۔
