کیلی فورنیا(پاکستان نیوز)تحقیقاتی ادارے ایف بی آئی نے کیلیفورنیا کے محکمہ پولیس کو خبردار کیا ہے کہ ایران مشرق وسطیٰ میں جاری کشیدگی کے ردعمل میں امریکی ریاست پر ڈرون حملے کرنے کی خواہش رکھ سکتا ہے۔ فروری 2026 کے آغاز میں ایسی معلومات حاصل ہوئی تھیں جن کے مطابق ایران امریکہ کی جانب سے ممکنہ حملوں کی صورت میں جواباً سمندری حدود میں موجود کسی نامعلوم جہاز سے کیلیفورنیا کو نشانہ بنانے کا منصوبہ بنا رہا تھا۔ اس حوالے سے جاری ہونے والی الرٹ میں بتایا گیا ہے کہ ایران کی جانب سے ان حملوں کے لیے بغیر پائلٹ کے اڑنے والے طیارے یا ڈرونز استعمال کیے جانے کا امکان ہے۔ تاہم حکام کا کہنا ہے کہ ان کے پاس اس مبینہ حملے کے وقت، طریقے یا مخصوص اہداف کے بارے میں مزید کوئی ٹھوس معلومات موجود نہیں ہیں۔ ایک ذریعے نے انکشاف کیا ہے کہ یہ اطلاع امریکی کوسٹ گارڈز کو موصول ہوئی تھی لیکن فی الحال اسے مکمل طور پر قابل بھروسہ قرار نہیں دیا گیا۔ ریاستی گورنر گیون نیوزوم نے ایک پریس کانفرنس کے دوران ان اطلاعات کی تصدیق کرتے ہوئے کہا کہ ان کا دفتر اس صورتحال سے باخبر ہے اور مقامی حکام کو تمام ضروری معلومات فراہم کی جا رہی ہیں۔ گورنر کے ترجمان نے واضح کیا کہ ہنگامی خدمات کا ادارہ وفاقی اور مقامی سیکیورٹی اہلکاروں کے ساتھ مل کر کمیونٹیز کے تحفظ کے لیے کام کر رہا ہے۔ گورنر کا مزید کہنا تھا کہ ڈرونز کے ذریعے لاحق خطرات ہمیشہ سے ان کی انتظامیہ کی ترجیحات میں شامل رہے ہیں اور اس سے نمٹنے کے لیے خصوصی گروپس بھی تشکیل دئیے گئے ہیں۔ دوسری جانب ایف بی آئی کے ترجمان نے ان رپورٹس پر تبصرہ کرنے سے انکار کرتے ہوئے کہا ہے کہ وہ اس معلومات کی نہ تو تصدیق کرتے ہیں اور نہ ہی تردید۔ گورنر ہاؤس کے مطابق اس طرح کی سیکیورٹی اپ ڈیٹس وفاقی شراکت داروں کی جانب سے روزانہ کی بنیاد پر موصول ہوتی رہتی ہیں۔ اس دوران سیکرامنٹو پولیس ڈیپارٹمنٹ نے تاحال ایف بی آئی کی جانب سے کسی بھی قسم کی باضابطہ اطلاع ملنے سے انکار کیا ہے۔
