نیویارک (پاکستان نیوز)امریکی کیبل نیٹ ورک سی این این کے بانی ٹیڈ ٹرنر بدھ کے روز انتقال کر گئے جس کی تصدیق ان کے قائم کردہ ادارے نے کی ہے۔ اس موقع پر ان کی سابقہ اہلیہ اور 88 سالہ معروف اداکارہ جین فونڈا نے سوشل میڈیا پر ایک نہایت جذباتی اور مفصل پیغام جاری کیا ہے۔ جین فونڈا جو 1991 سے 2001 تک ٹیڈ ٹرنر کی شریک حیات رہیں، انہوں نے اپنے سابق شوہر کو ایک بہادر، رومانوی اور غیر معمولی بصیرت رکھنے والا انسان قرار دیا ہے۔ ان کا کہنا ہے کہ ٹیڈ ٹرنر نے ان کی زندگی کو مکمل طور پر بدل کر رکھ دیا اور انہیں خود پر بھروسہ کرنا سکھایا۔ جین فونڈا نے لکھا کہ ٹیڈ محض ایک عام انسان نہیں بلکہ ایک ایسی شخصیت تھے جنہوں نے دنیا کا پہلا 24 گھنٹے چلنے والا خبری چینل اور کلاسک فلموں کا نیٹ ورک تخلیق کیا۔ وہ ایک عظیم ملاح تھے جنہوں نے امریکہ کپ جیتا اور ان کی حکمت عملی کا علم سکندر اعظم اور چنگیز خان جیسے فاتحین کے مطالعہ پر مبنی تھا۔ اداکارہ نے مزید بتایا کہ ٹیڈ ٹرنر قدرت اور جنگلی حیات سے بے پناہ محبت کرتے تھے اور انہوں نے کئی نایاب نسل کے جانوروں کو معدوم ہونے سے بچانے کے لیے اہم کردار ادا کیا۔ اداکارہ نے اپنے پیغام میں ٹیڈ ٹرنر کی شخصیت کے مختلف پہلوؤں کو اجاگر کرتے ہوئے کہا کہ وہ انتہائی مسابقتی مزاج کے مالک تھے لیکن ان کا دل بہت بڑا تھا۔ واضح رہے کہ ٹیڈ ٹرنر کو ان کی صاف گوئی کی وجہ سے ماؤتھ آف دی ساؤتھ بھی کہا جاتا تھا۔ انہوں نے 1980 میں سی این این کی بنیاد رکھ کر صحافت کی دنیا میں انقلاب برپا کیا تھا جس پر انہیں 1991 میں ٹائم میگزین کی جانب سے سال کی بہترین شخصیت قرار دیا گیا۔ ٹیڈ ٹرنر نے اپنے پیچھے پانچ بچے سوگوار چھوڑے ہیں جن کے بارے میں جین فونڈا کا کہنا ہے کہ وہ ان بچوں کی سوتیلی ماں بننے کو اپنے لیے اعزاز سمجھتی ہیں۔
