(پاکستان نیوز)محکمہ خزانہ اور آمدنی کی دیکھ بھال کرنیوالے ادارے کی جانب سے 2026 کے ٹیکس فارم 1040 کا ابتدائی خاکہ پیش کیا گیا ہے، جس میں ٹیکس دہندگان سے ان کی شہریت اور قانونی طور پر کام کرنے کی اجازت کے بارے میں سوال شامل کیا گیا ہے۔ اس مجوزہ تبدیلی کے تحت، امریکہ میں ٹیکس جمع کرانے والوں اور ان کے شریک حیات کو یہ تصدیق کرنی ہوگی کہ وہ امریکی شہری ہیں یا ملک میں کام کرنے کے مجاز ہیں۔ یہ تجویز کچھ قابلِ واپسی ٹیکس رعایتوں سے متعلق قواعد کو سخت بنانے کے منصوبے کا حصہ ہے، جس کا مقصد یہ یقینی بنانا ہے کہ وفاقی عوامی فوائد صرف اہل افراد کو ہی ملیں۔ اگر یہ قوانین منظور ہو جاتے ہیں تو گود لینے کی رعایت، تعلیم اور بچوں سے متعلق ٹیکس مراعات کی رقم حاصل کرنے کے لیے افراد کو حلفیہ بیان دینا ہوگا۔ اس نئے قانون سے 200,000 سے 700,000 کے قریب افراد متاثر ہو سکتے ہیں جو مختلف ٹیکس مراعات کے لیے درخواست دیتے ہیں۔ تاہم، ادارے کا کہنا ہے کہ اس سوال کو شامل کرنے کا مقصد تمام تارکین وطن کو ٹیکس گوشوارے جمع کرانے سے روکنا نہیں ہے اور نہ ہی یہ امریکہ میں عمومی ٹیکس دہندگی کی بنیادی شرط ہے۔ جن غیر ملکیوں کے پاس قانونی دستاویزات یا سوشل سیکیورٹی نمبر نہیں ہیں، وہ اپنی آمدنی کا حساب کتاب دینے کے لیے ٹیکس شناختی نمبر کا استعمال جاری رکھ سکتے ہیں۔ یہ پیشکش فی الحال حتمی شکل میں نافذ نہیں ہوئی ہے اور عوام سے اس پر رائے مانگی گئی ہے۔ اکتوبر 2026 میں اس معاملے پر عوامی سماعت کی جائے گی جس کے بعد حتمی ضوابط کا اعلان کیا جائے گا، اس لیے 2026 کے حتمی فارم میں تبدیلیاں ممکن ہیں۔
