اسلام آباد:
پاکستان تحریک انصاف اور گزشتہ حکومتوں میں لیے گئے قرضوں کی تفصیلات سامنے آگئیں۔
اسپیکر اسد قیصر کی زیر صدارت قومی اسمبلی کا اجلاس ہوا جس میں سوالات کے تحریری جوابات میں 2007 سے اب تک اندرون اور بیرون ملک حاصل کیے گئے قرضوں کی تفصیلات پیش کی گئیں۔ پیپلز پارٹی نے اپنے پانچ سالہ دور میں اندرون ملک 5316 ارب جبکہ بیرونی 18 اعشاریہ 95 ارب ڈالر قرضہ لیا۔
وزارت خزانہ نے بتایا کہ ن لیگ دور میں 8778 ارب روپے اندرونی جبکہ 16 اعشاریہ 78 ارب ڈالر بیرونی قرضہ لیا گیا۔ تحریک انصاف نے جولائی 2018 سے جون 2019 تک اندرونی 4313 ارب روپے جبکہ بیرونی 3 اعشاریہ 21 ارب ڈالر قرض لیا۔
موجودہ دور حکومت میں سعودی عرب، یو اے ای اور قطر سے حاصل کردہ قرضوں کی تفصیل بھی پیش کی گئی جس کے مطابق سعودی عرب نے نومبر اور دسمبر 2018 میں 2 ارب ڈالر قرض 3 فیصد سود پر دیا اور جنوری 2019 میں ایک ارب ڈالر قرض پاکستان کو دیا۔
یو اے ای نے جنوری اور مارچ 2019 میں ایک ایک ارب ڈالر قرض 3 فیصد سود پر دیا جبکہ قطر نے جون 2019 میں 500 ملین ڈالر قرض 3 فیصد سود پر دیا۔
