بھارت میں کورونا وائرس کے متاثرین کی تعداد 29 ہوگئی۔ ماسک کی قیمتوں میں اضافہ ہوگیا۔ وزیر اعظم اور بی جے پی رہنماؤں نے ہولی کی تقریبات میں شرکت منسوخ کردی۔
بدھ کو بھارتی وزیر صحت ہرش وردھن نے 28 کیسزکی تصدیق کی تھی۔ بعدازاں گروگرام میں مزید ایک اور کیس سامنے آںے کے بعد یہ تعداد 29 ہوگئی۔
راجستھان میں 18اطالوی سیاحوں اور ایک ڈرائیور کر قرنطینہ میں رکھا گیا تھا جن میں وائرس کی تصدیق ہوئی۔ اس کے علاوہ دہلی میں ایک، یوپی میں 6 ، تلنگانہ میں 1 اور کیرالا میں 3 کیسز سامنے آئے ہیں۔
بھارت نے تمام بین الاقوامی پروازوں کے مسافروں کی اسکریننگ کے احکامات جاری کردیے ہیں۔ 3مارچ تک ہوائی اڈّوں پر 5لاکھ 89ہزار مسافروں کی اسکریننگ کی جاچکی ہے۔ 27 ہزار افراد زیر نگرانی رکھے گئے ہیں۔
وائرس کے بڑھتے ہوئے کیسز کے پیش نظر وزیراعظم مودی اور بی جے پی کے سربراہ جے پی نڈا نے ہولی کی تقریبات میں شرکت نہ کرنے کا فیصلہ کیا ہے۔ وزیر داخلہ امت شا نے بھی 15مارچ کو حیدرآباد میں ہونے والی ریلی مؤخر کردی ہے۔
دہلی میں ادویہ کی دکانوں پر ہینڈ سینی ٹائزر اور ماسک کی طلب میں اضافے سے ان اشیا کی قلت ہوگئی ہے اور جو ماسک پہلے 150روپے میں دستیاب تھا اس کی قیمت 300روپے ہوگئی ہے۔
