اسلام آباد(پاکستان نیوز)حکومت پاکستان اور ٹرمپ حکومت کے درمیان پہلا باضابطہ رابطہ۔ تفصیلات کے مطابق جنوری 2025 میں امریکا کا اقتدار سنبھالنے والی ڈونلڈ ٹرمپ حکومت کی جانب سے حکومت پاکستان سے پہلا باضابطہ رابطہ کیا گیا ہے۔ بدھ کے روز نائب وزیر اعظم اور وزیر خارجہ اسحاق ڈار سے امریکی قومی سلامتی کے مشیر مائیکل والٹز کا ٹیلی فونک رابطہ ہوا۔ امریکی قومی سلامتی کے مشیر نے دہشت گردی کے خلاف حکومت پاکستان کی کوششوں پر صدر ڈونلڈ ٹرمپ کی جانب سے تعریف اور شکریہ ادا کیا۔ دفتر خارجہ کی جانب سے جاری بیان کے حوالے سے کہا گیا ہے کہ نائب وزیراعظم محمد اسحق ڈار نے قومی سلامتی کے مشیر کو عہدہ سنبھالنے پر مبارکباد دیتے ہوئے اس بات کا اعادہ کیا کہ پاکستان صدر ٹرمپ اور ان کی انتظامیہ سمیت امریکا کے ساتھ اپنے دیرینہ اور وسیع البنیاد تعلقات کو استوار کرنے کا خواہاں ہے۔ انہوں نے پاکستان کے انسداد دہشت گردی کے شعبے میں امریکا کے ساتھ تعاون جاری رہنے کے عزم کا اعادہ کیا۔ مائیکل والٹز نے صدر ڈونلڈ ٹرمپ کی جانب سے افغانستان میں پیچھے چھوڑے گئے امریکی فوجی سازوسامان کو واپس لینے کے اعلان کو بھی سراہا۔ اعلامیے کے مطابق فریقین نے آئی ٹی، توانائی اور معدنیات کے شعبوں میں تعاون بڑھانے کے عزم کا اعادہ کیا۔ انہوں نے آنے والے دنوں میں ایک وسیع البنیاد ایجنڈے کے حصے کے طور پر تجارت، سرمایہ کاری، موسمیاتی تبدیلی اور صحت پر بات چیت جاری رکھنے کی ضرورت پر بھی اتفاق کیا۔ واضح رہے کہ اس سے قبل امریکی کانگریس سے خطاب کے دوران امریکی صدر ڈونلڈ ٹرمپ نے دہشت گرد تنظیم سے وابستہ خطرناک دہشت گرد کی گرفتاری میں مدد فراہم کرنے پر پاکستان کا شکریہ ادا کیا تھا۔
