نیویارک(پاکستان نیوز)پاکستان نے انفارمیشن ٹیکنالوجی کے شعبے میں ایک ایسی غیر معمولی کامیابی حاصل کی ہے جس نے عالمی سطح پر ملک کا سر فخر سے بلند کر دیا ہے۔ حالیہ بین الاقوامی رپورٹ کے مطابق پاکستان نے آئی ٹی کی مہارتوں اور ڈیجیٹل ترقی میں 70 سے زائد ممالک کو پیچھے چھوڑتے ہوئے پہلی پوزیشن اپنے نام کر لی ہے۔ یہ کامیابی پاکستان کے ابھرتے ہوئے ٹیکنالوجی کے شعبے اور نوجوانوں کی غیر معمولی صلاحیتوں کا منہ بولتا ثبوت ہے۔ اس عالمی اعزاز کے پیچھے یورپ، مشرق وسطیٰ اور افریقہ کے 500 سے زائد بین الاقوامی تعلیمی اداروں اور اکیڈمیوں کے درمیان ہونے والا سخت مقابلہ تھا، جہاں پاکستانی نوجوانوں نے اپنی فنی مہارتوں کا لوہا منوایا۔ اس تاریخی کامیابی میں خصوصی کمیونیکیشن آرگنائزیشن کے سافٹ ویئر ٹیکنالوجی پارک میرپور اور سسکو اکیڈمی نے کلیدی کردار ادا کیا ہے۔ ان اداروں نے جدید ترین عالمی معیار کی تربیت فراہم کر کے نوجوانوں کو بین الاقوامی منڈی کے تقاضوں کے مطابق تیار کیا۔ رپورٹ میں یہ بھی انکشاف کیا گیا ہے کہ آزاد کشمیر اور گلگت بلتستان میں قائم 100 سے زائد آئی ٹی سیٹ اپس نے اس سفر میں ریڑھ کی ہڈی کی حیثیت حاصل کی۔ ان دور افتادہ علاقوں سے تعلق رکھنے والے باصلاحیت نوجوانوں کی محنت نے پاکستان کا پرچم پوری دنیا میں بلند کر دیا ہے۔ ماہرین کا کہنا ہے کہ یہ کامیابی نہ صرف پاکستان کی ڈیجیٹل ترقی کا ثبوت ہے بلکہ اس سے ملک میں روزگار کے نئے مواقع پیدا ہوں گے اور غیر ملکی سرمایہ کاری میں بھی اضافہ ہوگا۔ حکومتی سطح پر ایس سی او اور سسکو اکیڈمی کی ان مشترکہ کوششوں کو ملک کی تکنیکی ترقی کے لیے ایک سنگ میل قرار دیا جا رہا ہے، جس سے مستقبل میں پاکستان کی ڈیجیٹل معیشت کو مزید استحکام ملے گا۔
