اب محسوس ہو رہا ہے کہ آٹھ فروری کو انتخابات کا انعقاد ہونے جارہا ہے۔ تحریک انصاف پر دبائو کے باوجود انکے کافی اہم عہدیدار انتخابات کے میدان میں اتر چکے ہیں وکلاء امیدواروں کو ٹکٹ دیکر پی ٹی آئی نے پارٹی کے حق میں ایک قانونی ٹیم کو میدان میں لے آکر ایک نہایت بہتر حکمت عملی کی تشکیل کی ہے۔ سردار لطیف کھوسہ اور گوہر خان کی سربراہی میں وکلا کی ایک ٹیم اپنی پارٹی کیلئے عدالتوں میں سرگرم عمل ہیں۔ جس رفتار سے ان کی جماعت پر قدغن لگائے جارہے ہیں۔ اس سے ثابت ہو رہا ہے کہ طاقتور لوگ ان کی عوام میں حمایت سے خوفزدہ ہیں۔ کہتے ہیں ناکہ ہر عمل کا ردعمل ہوتا ہے اس بات کو سمجھنے کیلئے آپکا پی ایچ ڈی یا بہت پڑھا لکھا ہونا ضروری نہیں آپ جب بھی پانی کی دھار کو بند کے ذریعے روکنے کی کوشش کرینگے تو اس سے پانی کی طاقت بڑھیگی گھٹے گی نہیں۔ اسٹیبلشمنٹ کو سمجھنا چاہئے کہ کچھ لوگ انکے درمیان بیٹھ کر ان سے غلط مشوروں کے ذریعے غلط فیصلے کروا رہے ہیں۔ جس کا براہ راست فائدہ انصاف پارٹی کو ہو رہا ہے۔ ورنہ درحقیقت اس جماعت کو جتنا ہوا بنایا جارہا ہے اتنی عوامی حمایت انہیں حاصل نہیں دوسری بات یہ ہے کہ عوام کو نگران حکومت نے کوئی بڑا ریلیف نہیں دے پائی ہے۔ گمشدہ افراد کے معاملے میں کوئی قابل عمل حل نہیں سامنے آیا ہے اور جس سے عوام میں بے چینی اور اضطراب پیدا ہو رہا ہے جس کا فائدہ یہ کاغذی شیر عدالتی جنگ لڑ کر اپنے سینوں پر خود ہی بہادری کے تمغہ لگا رہے ہیں۔ اور عوام کو یہ جھوٹا دلاسہ دے رہے ہیں کہ ہم آپکی جنگ لڑ رہے ہیں۔ اور نگران حکومت کے وزراء کی سیاسی ناتجربہ کاری کی وجہ سے یہ سیاسی جماعت اپنا وزن بڑھانے کی کوشش کر رہی ہے۔ ورنہ اگر نگران حکومت بہتر حکمت عملی اپنائے اور اسٹیبشلمنٹ اور نگران حکومت مشترکہ مثبت سیاسی فیصلے کریں تو اس پارٹی کے مقدر میں شکست لکھی جاچکی ہے۔ بلوچستان میں معاملات کو بہتر طریقہ سے حل کریں تو اسکے مثبت اثرات سندھ میں بھی نظر آئینگے۔ پنجاب تین حصوں میں بٹ گیا ہے سیاسی طور پر وہ کسی ایک جماعت کے پیچھے نہیں۔ پختونخواہ میں جو جماعت کے پاس فنڈز زیادہ ہونگے وہ پہلی یا دوسری پوزیشن حاصل کرنے میں کامیاب ہوگی۔ بلوچستان سے اخترمینگل کو انتخابی عمل سے باہر رکھنے کا فیصلہ غلط ہے جسکے نقصانات آٹھ فروری کے بعد عیاں ہونگے۔ بلوچستان کی احتجاج کرنے والی خواتین اور بچوں پر کھلے عام پولیس تشدد نے وفاق کے خلاف سندھ بلوچستان میں نفرت میں اضافہ ہوا ہے ان پولیس افسران کو فوری گرفتار کرکے ہائیکورٹ کے جج کی سربراہی میں تحقیقات کا حکم دیا جانا چاہئے تھا۔ اب یہ کہانی آٹھ فروری کو یا اسکے فوراً بعد ختم نہیں ہونے والی ہے۔ ناعقب اندیش فیصلہ سازوں نے اپنے ہاتھ پیر خود کاٹ دیئے ہیں اور اب حالات تیزی سے تنزلی کی طرف رواں دواں ہیں۔ آٹھ فروری کے بعد حالات مزید خرابی کی طرف جائیں گے جن کے بعد نتائج کیخلاف ایک پی این اے کی طرح کی تحریک چل پڑنے کا خدشہ ہے۔ جس میں ایک طرف مولانا فضل الرحمان کھڑے ہونگے تو دوسری طرف سراج الحق، عدلیہ تو ویسے بھی چھٹی پر ہے اگر نہیں بھی ہوتی اور اگر مخالفانہ فیصلے کرتی تو اسے چھٹی پر بھیج دیا جاتا۔ اسٹیبلشمنٹ کو بیک وقت پنجاب اور پختونخواہ میں اُلجھا کر جھگڑا بلوچستان میں محاذ جنگ بنانے کا پروگرام بنایا جارہا ہے جسے اہمیت نہیں دی جارہی ہے۔ اس باغی پارٹی کو ان بیرونی طاقتوں کی حمایت حاصل ہے۔ جنہیں معلوم ہے کہ اگر موجودہ سازش ناکام ہوئی تو کئی دہائیوں تک پاکستان کا کچھ بگاڑہ نہیں جاسکے گا۔ اسلئے فیصلہ سازوں کو ایک نہایت مشکل صورتحال کا سامنا ہے اور سوچ سمجھ کر سندھ وبلوچستان کے دانشوروں صحافیوں اور تاجروں کو اپنے ہاتھ بٹھا کر مدبرانہ فیصلے کرنا اس نازک وقت کی اہم ضرورت ہے۔ دشمن ورنہ عیارانہ چال چل جائیگا اور مقتدر حلقہ ہاتھ ملتے رہ جائیں گے۔
٭٭٭٭
