واشنگٹن (پاکستان نیوز)محکمہ موسمیات نے ملک کے مختلف حصوں میں شدید موسم اور طوفانی صورتحال کی پیشگوئی کی ہے۔ قومی موسمیاتی ادارے نے آٹھ بڑی امریکی ریاستوں کو خبردار کیا ہے کہ وہاں اتوار کے روز غیر معمولی طوفان آ سکتے ہیں۔ ان طاقتور طوفانوں میں گرج چمک، موسلا دھار بارش، تیز ہواؤں اور بڑے سائز کے اولوں کے ساتھ ساتھ بگولے اٹھنے کا بھی امکان ہے۔ اعداد و شمار کے مطابق الینوائے، انڈیانا، اوہائیو، کینٹکی، ورجینیا، مغربی ورجینیا، پنسلوانیا اور میری لینڈ میں بگولے آنے کا 2 فیصد امکان موجود ہے۔ خطرے کے پیش نظر شہریوں کو ہدایت کی گئی ہے کہ وہ مقامی خبروں اور ریڈیو سے باخبر رہیں۔ بگولے کی صورت میں گھر کے تہہ خانے یا کھڑکیوں سے دور کسی اندرونی کمرے میں پناہ لیں اور وقت میسر ہو تو اپنے پالتو جانوروں کو بھی ساتھ رکھیں۔ دفتری یا تعلیمی اداروں میں موجود افراد فوری طور پر مخصوص کردہ حفاظتی مقامات پر منتقل ہو جائیں اور بڑے ہال یا جمنازیم میں جانے سے گریز کریں۔ اگر آپ باہر ہوں تو کسی مضبوط عمارت میں پناہ لیں کیونکہ خیمے یا عارضی گھر محفوظ نہیں ہوتے۔ گاڑی میں سفر کرنے والے افراد قریبی محفوظ عمارت تک پہنچنے کی کوشش کریں، اور اگر یہ ممکن نہ ہو تو گاڑی میں ہی سر ڈھانپ کر جھک جائیں یا کسی قریبی نشیبی علاقے جیسے کھائی یا گڑھے میں پناہ لیں۔
