شہزاد حمید احمد کو صنفی مساوات 2020 کے ایوارڈ سے نوازا گیا،وہ پاکستان کے معروف انگریزی اخبار کے لیے بھی خدمات انجام دے چکے ہیں
نیویارک(پاکستان نیوز) پاکستانی نژاد سنگاپورین فلم ساز و صحافی شہزاد حمید احمد نے اپنی منفرد دستاویزی فلموں اور صنفی تفریق کے خاتمے سے متعلق مواد بنانے پر عالمی ایوارڈ جیت لیا۔33 سالہ شہزاد حمید احمد اگرچہ نائیجیریا میں پیدا ہوئے، تاہم ان کے آباؤ اجداد کا تعلق پاکستان سے ہی ہے اور وہ یہاں پلے بڑھے، لیکن بعد ازاں سنگاپور منتقل ہوگئے۔ شہزاد حمید احمد نے ماضی میں پاکستان کے پہلے انگریزی نیوز چینل ڈان نیوز کے ساتھ بھی کام کر چکے ہیں جب کہ بطور صحافی وہ سنگاپور کے متعدد نشریاتی اداروں کے ساتھ بھی منسلک رہے ہیں۔ شہزاد حمید احمد کو زیادہ تر صنفی مساوات سے متعلق نیوز رپورٹس اور دستاویزی فلمیں بنانے کی وجہ سے شہرت حاصل ہے اور انہیں ان کے اسی کام کی وجہ سے ہی سنگاپور کی ایک تنظیم نے ایوارڈ سے نوازا۔ یونائیٹڈ ویمن سنگاپور(یو ڈبلیو ایس) کی جانب سے پاکستانی نڑاد فلم ساز کو صنفی مساوات کے 2020 کے ایوارڈ سے نوازا گیا۔
