کھیل اور جنگ میں فرق ہونا چاہیئے یو اے ای میں ایشیا کرکٹ کپ ختم ہوا جس میں کھیل کے اصولوں کے منافی بہت سی حرکات ہوئیں جو میڈیا اور سوشل میڈیا پر زیر بحث ہیں ہر کوئی اپنے تعیں اس میں حصہ ڈال رہا ہے سوشل میڈیا تو بھرا پڑا ہے کیونکہ وہاں کوئی روک ٹوک نہیں جو دل میں آئے کہہ ڈالو ایک عامی سے لیکر دنیا کا بڑے سے بڑا سمجھدار وہاں موجود ہے اور اپنی موجودگی شو کرتا ہے بھلے وہ خاموش رہ کر ہی کرے جی تو بات ہورہی تھی، ایشیا کرکٹ کپ میں کھیل کی سپرٹ کی پامالی کی پہلی بات کہ پاکستان کرکٹ ٹیم کے کپتان سے انڈین کرکٹ ٹیم کے کپتان نے ٹاس جیتنے کے بعد ہاتھ نہیں ملایا گو کہ رولز میں نہیں لیکن آج تک ایسا نہیں ہوا اور دوسری پاکستان کو اپنا روائیتی حریف نہ گننے والے انڈین کرکٹ ٹیم کے کپتان نے کوالیفائی راونڈ میں پاکستان کو ہرانے کے بعد جو بیان دیا اسے سب نے سنا جس میں اس نے نام نہ لیکر پاکستان پر الزام اور انڈین آرمی کی تعریفوں کے پل باندھ دئیے تیسری اگلے رائونڈ میں پاکستان کو ہرانے کے بعد پاکستان کو کرکٹ میں اپنا روائتی حریف تسلیم کرنے سے انکار کر دیا اور نمبر گیم کا حوالہ دیتے ہوئے کہا کہ دس ایک یا آٹھ صفر کوئی حریف نہیں ہوتا غالبا وہ دوران میچ پاکستان کے فاسٹ بائولر حارث روف کے تماشائیوں کی طرف سے ان پر ہوٹنگ کے جواب میں ہاتھوں سے چھ صفر اور جہاز کے گرنے کے اشارے کو بیان کر گئے ہونگے، حارث روف کو جس پر جرمانہ بھی ہوا ہندوستان کرکٹ ٹیم کے کپتان نے صحافیوں کے سوالوں کا جواب دیتے ہوئے ایسی باتیں کیں جو لازما فیڈ کی جاتی ہیں ہندوستان کوئی موقع ہاتھ سے جانے نہیں دیتا ادھر پاکستانی اسٹیبلشمنٹ تو سیلاب کے علاوہ بھی ناکوں ناکوں ڈوب چکی ہے اس طرح کی حرکتوں سے جس کا ثبوت محسن نقوی کا سینیٹر ، وزیر داخلہ اور پتا نہیں کیا کچھ ہوجانے کے باوجود کرکٹ بورڈ کی چیئرمینی اور پھر ایشین کرکٹ کی سربراہی جس کی پشت پر اسٹبلشمنٹ کا پورا ہاتھ ہے شاہد آفریدی کیا کم تھا کہ اب حارث روف بھی اس کے نقش قدم پر چل نکلا صحبت کا اثر ہو نہ ہو محسن نقوی کی خوشنودی بھی تو کارکردگی میں ہی شامل گنی جائے گی چوتھی اب ایشیا کپ کے اختتام پر انڈین کرکٹ ٹیم نے وننگ ٹرافی لینے سے انکار کر دیا وجہ ایشین کرکٹ کونسل کے سربراہ محسن نقوی جو کہ پاکستانی ہیں کے ہاتھ سے وہ ٹرافی وصول نہیں کریں گے یہ سب ہو کیا رہا ہے کھیل کے میدان کو کھیل کا میدان ہی رہنے دیں اسے جنگ کا میدان نہ بنائیں سپورٹس مین سپرٹ بھی کوئی چیز ہوتی ہے اوپر سے خطے میں نئے نئے اتحاد وجود میں آ رہے ہیں جس سے جنگ کے ساتھ ساتھ نفرت بڑھنے کے امکانات ہیں (جو ایک الگ کالم کا متقاضی ہے )صرف کرکٹ ہی ایک ایسا کھیل تھی جسے دونوں ملکوں کے عام عوام اینجوائے کرتے تھے لیکن اسے بھی جنگ کا میدان بنائیں گے تو تلخیاں مزید بڑھیں گی ایک وقت تھا جب ماضی میں پاکستانی آرمی چیف کرکٹ ڈپلومیسی کے طور پر انڈیا میچ دیکھنے کے بہانے ممکنہ جنگ رکوانے چلے گئے تھے اور ایک حالیہ آرمی چیف ہیں جو اپنے کارندوں کے مدد سے جیتی ہوئی جنگ کی بازگشت کو تھمنے نہیں دے رہے کھیل کو کھیل ہی رہنے دیں تاکہ سب انجوائے کریں ۔
٭٭٭
